Sch’ün iffaunt d’ün’otra regiun linguistica svizra u da l’ester vain a ster a Samedan e nu so üna u tuottas duos linguas d’instrucziun, schi alura suos-cha’l frequenter lecziuns d’integraziun linguistica.

In media haun lö quistas lecziuns düraunt duos ans. I’ls prüms mais frequaintan ils iffaunts fin a desch lecziuns l’eivna in gruppas pitschnas separedas u dafatta sulets. La dotaziun da lecziuns vain successivmaing redütta.

Normelmaing nu succeda quist agüd integrativ in lecziuns supplementeras, dimpersè tenor cunvegna culla magistra/cul magister da classa per granda part düraunt il temp d’instrucziun reguler da l’iffaunt.