Chalandamarz a Samedan
Stimos genituors
Cheras scolaras e chers scolars
Il ChaIandamarz ed il bal sun occurrenzas obligatoricas. Il cortegi ho lö per regla als prüms marz, il bal ho lö la sanda seguainta.
1. Tröps
Que do 4 tröps, chi giran tres Samedan. Mincha tröp vain mno dad ün mat e dad üna matta. Els occupan las scharschas da sain/saina ubain da chaschier/chaschiera. Mincha tröp consista our da var 50 iffaunts.
2. Scharschas
A las giuvenilas ed als giuvenils da las ultimas classas vegnan assegnedas las scharschas tenor data da naschentscha ed ans da scoula passantos a la scoula cumünela. La spartiziun exacta vain fatta tenor cunvegna culs giuvenils.
A do las seguaintas scharschas:
– sain & saina
– patrun & patruna
– chaschier & chaschiera
– chavals & chavallas
– prüms pesters & prümas pestras
– pesters & pestras
– «vachas» (scolars:ras da la scoula primara)
3. Cortegi
– Lö d’inscunter: 06:45 sün plazza da scoula
– Posa da mezdi: ca. da las 12:10 fin las 13:30
– Finischun: ca. a las 16.30 sün plazza da scoula
La ruta ed ils uraris precis vegnan publichos a temp ütil sülla pagina d’internet da la scoula.
4. Rösas
Tuot ils scolars e las scolaras faun lur rösas svess a chesa (INSTRUCZIUN “RÖSAS”).
Per dumandas lotiers as pauns Els gugent adresser al magister/a la magistra da classa.
Per suter al bal la polonaisa, as dumandan ils iffaunts traunter pêr per cha michün e minchüna hegia ün cumpagn/üna cumpagna da sot. Scu gest barattan els üna pitschna rösa per il bal.
5. Materiel/vstieus
S-chellas: Tuot ils iffaunts da la 1a fin 6evla classa drouvan üna s-chella, ch’els organiseschan autonomamaing.
Per il cortegi portan ils iffaunts üna blusa blova, ün fazöl cotschen intuorn il culöz ed üna chapütscha cul püschel cotschna.
Il vstieu vain decoro cullas rösas (guarda purtret).
A tuot ils giuvenils e las giuvenilas chi haun üna scharscha (7evla-9evla classa) vegnan ils vstieus ed oter materiel miss a disposiziun da la scoula. Els vegnan infurmos a temp da lur scharscha.
Las mattas da l’ultima classa haun dad organiser autonomamaing ün costüm engiadinais per il bal da Chalandamarz.
6. Bal
A Samedan ho il bal adüna lö la prüma sanda zieva ils prüms marz. La part ufficiela dal bal düra per ils scolars e las scolaras da la primara da las 18.00 fin circa las 22.30, per ils scolars e las scolaras dal s-chelin ot da las 18.00 fin circa las 00.00. Las classas primaras dispêras preparan üna producziun da teater. Il bal cumainza cun quella producziun; zieva sotan ils iffaunts tar musica populera; a la fin da la part ufficiela sotan tuot ils iffaunts cun lur cumpagn/cumpagna la polonaisa.
Ils iffaunt as tiran aint festivamaing.
La Giuventüna da Samedan spordscha da baiver e da manger, ils iffaunts clappan ün bun per mangiativas e bavrandas.
A partir da las 22.30 güdan ils scolars e las scolaras da las 8evlas classas a fer uorden, per ils iffaunts da la primara cumainza la part facultativa dal bal inua cha iffaunts e creschieus haun la pussibilted da suter fin circa las 23.30 tar musica populera. La bar da la Giuventüna es avierta eir düraunt la seguonda part da la saira. Eir quista part dal bal, chi finischa intuorn mezzanot, as concluda cun üna versiun scurznida da la polonaisa.
settember 2024, Cumischiun da Chalandamarz
